Isang dayuhan sa Boracay ang nagrereklamo matapos umano siyang mapagtripan ng isang tattoo artist. Ayon sa turista, inalok siya ng libreng tattoo kapalit ng pagkuha ng larawan para sa social media promotion.
Dahil sa ganda ng mga ipinakitang disenyo ng artist, pumayag ang dayuhan at natuwa nang sabihin ng artist na "mga salita ng Diyos" ang ididisenyo sa kanyang balat.
Habang ginagawa ang tattoo, ikinatuwa ng dayuhan ang mga paliwanag ng artist tungkol sa kahulugan ng disenyo. Ngunit matapos ang session, nalaman niya mula sa isang kakilalang Pinoy na hindi maganda ang mga nakasulat sa kanyang balat. Ayon sa kakilala, ang mga salitang itinato ay hindi banal kundi mga bastos at nakakainsulto.
Agad bumalik ang dayuhan sa tabing-dagat kung saan niya huling nakita ang tattoo artist, ngunit bigo siyang makita ito. Sinubukan niyang magtanong sa iba pang mga artist sa lugar ngunit wala ring makapagbigay ng impormasyon tungkol sa pinaghahanap. Dahil dito, labis na nadismaya ang turista sa insidente at nangakong ipapaayos ang tattoo sa ibang lugar.
Sa harap ng ganitong panloloko, nagbigay babala ang dayuhan sa iba pang turista na mag-ingat sa pagtanggap ng mga serbisyong inaalok sa tabing-dagat. Pinayuhan niya ang mga kapwa turista na suriing mabuti ang kredibilidad ng mga artist at siguraduhing alam ang eksaktong disenyo bago magpatattoo. Ang insidenteng ito ay nagsisilbing paalala na maging mapanuri sa bawat serbisyong tinatanggap, lalo na sa mga hindi kilalang lugar.
Photo: Facebook/User
No comments:
Post a Comment