Kris Aquino, Uuwi na sa Pilipinas sa Setyembre Ayon kay Bimby
Photo: Kris/IG
Ibinahagi ni Bimby Aquino na uuwi na sa Pilipinas si Kris Aquino matapos ang dalawang taong gamutan sa US. Sa isang selebrasyon ng ika-50 kaarawan ni Biñan Rep. Len Alonte-Naguiat noong Lunes sa Shangri-La at The Fort, masaya niyang ipinahayag ang magandang balita sa mga bisita. Ayon kay Bimby, inaasahan nilang makakabalik si Kris sa Setyembre, ngunit maaring umabot ng Oktubre, kung magiging maayos ang lahat. “Masaya akong makakasama na namin ulit si Mama sa bahay,” masayang sinabi ni Bimby, na naglaan ng oras para ihandog ang balita sa kanyang mga kaibigan at tagasuporta.
Matapos ang kanyang pag-gamot sa US, sinasabi ni Bimby na bumubuti na ang kondisyon ni Kris. Gayunpaman, kailangan pa rin ng sipag at dedikasyon upang matiyak ang lubos na paggaling. “Bumubuti na si Mama, pero kailangan pa rin ng oras at pangangalaga,” dagdag ni Bimby. Siya ang magiging pangunahing tagapag-alaga sa kanyang ina pagbalik nila sa Pilipinas, katulad ng ginawa niya habang nasa US sila. Matatandaang si Kris, na anak ng pumanaw na dating Pangulong Cory Aquino at dating Senador Ninoy Aquino, ay nagkaroon ng chronic spontaneous urticaria at kalaunan ay nagkaroon ng komplikasyon tulad ng erosive gastritis at gastric ulcer noong Marso 2022.
Samantala, sa kabila ng mga pagsubok, patuloy ang pag-puri ni Kris sa mga taong nagbigay suporta sa kanya. Isa na rito si Vice Governor Marc Leviste, na tinanggap ang pasasalamat ni Kris sa kanyang Instagram post. Sinabi ni Kris na pinasasalamatan niya ang mga ginagawa ni VG Marc para sa kanya, ngunit pinaalalahanan siya nito na mahalaga rin ang kanyang tungkulin sa kanyang nasasakupan. Humingi rin siya ng pasensya sa mga Batangueño, na nauunawaan ang oras na inilalaan sa kanya ni VG Marc. Ayon kay Kris, hindi na siya magiging sagabal at magpo-focus na sa kanyang sariling pag-galing at pag-aalaga sa sarili habang siya'y nasa bansa.
No comments:
Post a Comment